Букмекерлер жарнама жібере алмайды: Тоқаев жаңа заңдарға қол қойды

Президент Қасым-Жомарт Тоқаев обырды ерте анықтауға арналған скринингтерді тегін ету және букмекерлік жарнамаға шектеу қою жөніндегі заңға қол қойды, деп хабарлайды Orda.kz.

Мемлекет басшысы бірқатар саланы қамтитын — денсаулық сақтау, жарнама және ойын бизнесіне қатысты заңға қол қойды.

Денсаулық сақтау жүйесіне енгізілген өзгерістер халықтың жекелеген медициналық қызметтерге қолжетімділігін кеңейтуге бағытталған. Енді онкологиялық ауруларды ерте анықтауға арналған скринингтер міндетті әлеуметтік медициналық сақтандыру жүйесі арқылы емес, кепілдендірілген тегін медициналық көмек шеңберінде жүргізілетін болады.

Сонымен қатар, мүгедектігі ресми түрде расталмаған азаматтарды да есту құрылғыларымен қамтамасыз ету мәселесі заң жүзінде шешімін тапты.

Заң жобасындағы келесі маңызды өзгерістер ойын бизнесіне қатысты. Букмекерлік кеңселер мен тотализаторлар жарнамасына бірқатар шектеулер қойылды. Атап айтқанда, ұялы байланыс құрылғылары арқылы және онлайн-платформаларда жарнама таратуға тыйым салынды.

Сонымен бірге, енді тек спорт тақырыбындағы бұқаралық ақпарат құралдарында ғана мұндай жарнамаларға рұқсат беріледі.

Жаңа нормаларға сәйкес, бостандығы шектелгендер мен шартты түрде сотталған азаматтарға құмар ойындарға және бәс тігуге қатысуға тыйым салынады.