Британ парламенті Украинадағы аштықты геноцид деп таныды

Британ парламенті Қауымдар палатасының депутаттары 1930 жылдардағы Украинадағы аштықты украин халқының геноциді деп тану шешімін бірауыздан қолдады.

Мәселені дауысқа салуға Ұлыбританияның консервативті партиясының депутаты Полин Летам бастамашы болды. Оның айтуынша, бұл шешім Ресей президенті Владимир Путинге оның Украинаға ашқан соғысына байланысты жолдау болуы керек.

«Кеңес одағы миллиондаған украиндықты аштыққа ұшыратып, мәжбүрлеп қоныстандыру арқылы жойды, бұл Украинадағы бүгінгі оқиғаларды еске түсіреді. 30-жылдардағы Сталин бүгінгі Путин сияқты украин халқын және болмысын жойғысы келді», - деді депутат.

Украинаның Жоғарғы Радасы бұл аштықты украин халқына қарсы геноцид деп жариялады. Аштан қыруды украин халқының геноциді деп ресми мойындаған елдер қатарында АҚШ, Канада, Австралия, Португалия, Мексика, Бразилия, Франция, Исландия елдері бар.