Брекешев президент сынынан кейін киіктерге қатысты жоспармен бөлісті

Экология, геология және табиғи ресурстар министрі Серікқали Брекешев Қазақстандағы киіктердің популяциясын реттеу туралы шешім қабылданғанын айтты.

– Президент сынынан кейін барлық мүдделі мемлекеттік органдармен, қауымдастықтармен, институттармен, ғалымдармен тағы да бас қостық. Киіктер популяциясын реттеу және пайдалану мәселелері тағы да талқыланды. Біз ғылыми зерттеулерді тереңдете жүргізу, көші-қон жолдарын, мекендеу орындарын, жемшөп базасын қарау қажет деген қорытындыға келдік, бұл өте маңызды, – деді Брекешев ОКҚ брифингінде журналистердің сұрақтарына жауап бере отырып.

Министр ақбөкендердің саны үнемі өсіп отырмайтынын атап өтті. Оның айтуынша, популяцияның белгілі бір шегі бар, содан кейін киіктерде тамақ пен су табу үшін ішкі бәсекелестік пайда болады.

– Популяция ішіндегі бәсекелестіктің артуы жануарларды әлсіретеді. Сондықтан осы мәселелердің бәрін тағы да қарап, талқылаймыз, содан кейін дұрыс шешімге келеміз деп ойлаймын. Бірақ тарихи тұрғыдан алсақ, мысалы, кеңестік дәуірде мұндай тәжірибе болды - популяция деңгейі сақталды. Сонымен қатар, ол кезде теріні, мүйізді өндіру және етін пайдалану дұрыс әрі сауатты жүргізілді. Ғылыми зерттеу жүргізгеннен кейін жиналып, шешім қабылдаймыз. Ғылыми зерттеулер бір-екі жылға созылуы мүмкін. Сондықтан, зерттеу нәтижесін алмайынша, реттеу немесе пайдалану туралы шешім қабылданбайды, – деп түсіндірді министр.