Бразилия футбол королі Пелемен қоштасуда

Пелемен қоштасу оның туған қаласы Сантостағы стадионда өтеді. Ал, футболшының туыстары оның жерлейтін орнын өзгертуге шешім қабылдаған.

«ФК Сантос» аренасы трибунасында аты аңызға айналған ойыншының денесі салынған табыт орналасқан,  алаңның ортасына шатыр орнатылып, «Футбол королі жасасын!» және «Пеле 82» деген жазуы бар алып баннерлер ілінген.

Қоштасу бір күнге созылады, содан кейін Пелені  Сантос көшелерімен алып өтеді. Стадиондағы жанкүйерлер мен табыттың арасы  небәрі жеті метр. Еске алу кешіне 1 қаңтарда ант қабылдаған Бразилия президенті Лула да Силва да қатысады деп күтілуде.

Еске салайық, Пеле 29 желтоқсанда Сан-Паулу қаласындағы жеке клиникалардың бірінде тік ішектің үдемелі ісігінен қайтыс болды. Бразилияда үш күндік қаралы күн жарияланды. Футболшының анасы тірі, Сантоста тұрады, ол 100 жаста.

Пеле Сантоста орналасқан  -  дүниедегі ең биік зираттың тоғызыншы қабатындағы жерленуді қалаған.  Ол бұл жерден спорттық мансабын бастаған стадионды «көріп жататынын» айтқан болатын.

Дегенмен, танымал бразилиялық G1 порталының хабарлауынша, отбасы логистикалық себептерге байланысты болжамды жерлеу орнын ауыстырған, сондай-ақ Пеле бейітіне зиярат ету  зираттағы тәртіпті бұзады деп қауіптенген. Олар жерлеу қабатын тоғызыншыдан біріншіге ауыстырғылары келеді.