Бразилиядан әуе оқиғасын зерттеу орталығы өкілдері Ақтауға ұшып келді

Әзірбайжан ұшағының апатқа ұшырауына байланысты Бразилияның авиациялық оқиғаларды тергеу және алдын алу орталығы (CENIPA) өкілдері Ақтауға ұшты, деп хабарлайды ҚР Көлік министрлігінің баспасөз қызметі.

Оқиға орнында бірлескен міндеттер белгіленетін кеңес өтті.

Бұған дейін Ақтауға Embraer зауытының өкілдері келген болатын. Халықаралық азаматтық авиация ұйымы да өз сарапшысын Ақтауға жіберуге дайын екенін мәлімдеді.

Желтоқсанның 26-сы күні әлемдік орталық ақпарат құралдарының бірі Еуропалық Euronews телеарнасы ұшақтың құлауына ресейлік зымыран себеп болғанын хабарлады. Әзірбайжан ақпарат құралдарының хабарлауынша, әңгіме ресейлік «Пантсир-С» әуе шабуылына қарсы қорғаныс жүйесі туралы болып отыр.

Сонымен бірге, осыдан сәл бұрын қазақстандық сенатор Андрей Лукин Ақтау маңында құлаған ұшақтың құлау нұсқасы туралы көпшілік алдында ашық айтпауға шақырды.