Браконьер Instagram желісінде жарияланған видео арқылы табылды

Полицейлер 5 қаңтарда әлеуметтік желіде жарияланған видеоға назар аударды. Бұл елордадағы ЖЭО маңындағы су қоймасындағы браконьерлік фактіге қатысты оқиға болатын.

Екі ер адам заңсыз үйрек аулаған. Тәртіп сақшылары видеоға қатысушылардың бірін анықтап үлгерді, ол жергілікті тұрғын болып шықты. Екіншісінің де жеке басы көп ұзамай анықталатыны анық.

«Құқық қорғау органдары табиғатты қорғау заңнамасын бұзу фактілері бойынша процессуалдық шешім қабылдайды. Еске салайық, Ақмола облысында үйрек аулау кезеңі тамыз айының соңғы сенбісінен 30 қарашаға дейін ғана жарамды»  делінген Экология министрлігінің Орман шаруашылығы және жануарлар дүниесі комитетінің хабарламасында.