БҚО-да су басу жағдайы қиындай түсті

«Қазгидромет» РМК-нан Дерқұл өзеніндегі су деңгейінің көтерілуі туралы шұғыл ескерту түсті, деп хабарлайды БҚО өңірлік коммуникациялар қызметі.

Жергілікті атқарушы органдар мен Төтенше жағдайлар департаменті тарапынан жергілікті жерлерде кезекшілік ұйымдастырылған. Су нысандарына мониторинг жүргізілуде. Гидробақылау екі сағат сайын жаңартылып отырады.

«Облыс әкімінің орынбасары Балтаевтың жетекшілігімен облыстың төтенше жағдайлар жөніндегі комиссиясының шұғыл отырысы өтті. Комиссия облыс орталығынан Төтенше жағдайлар департаментінің бөлімшелерін ұсыну туралы шешім қабылдады» делінген хабарламада.

Жағдайдың қиындай түсуіне байланысты Тасқала ауданындағы Тасқала ауылына және Бәйтерек ауданындағы Зеленое ауылына құтқару бөлімшелері мен техника жеткізілді, Төтенше жағдайлар департаменті тұрғындарды хабардар етті.

11 наурыз күні таңертең Орал қаласында түрлі нысандардың жертөлелерін су басу бойынша 10 жағдай, жеке тұрғын үйлердің іргелес аумақтарын су басу бойынша 13 факті тіркелді. Орын алған апат салдарынан ешкім зардап шекпеген, мал басқа жаққа айдалған жоқ.