Бозымбаев су тасқыны салдарынан келтірілген шығынды өтеу алгоритмін әзірлеуге екі күн уақыт берді

 Премьер-Министрдің орынбасары Қанат Бозымбаев су тасқыны салдарынан келтірілген шығынды өтеу алгоритмін әзірлеуге екі күн уақыт берді, деп хабарлайды премьер-министрдің баспасөз қызметі.

«Қазақстан Республикасы Премьер-Министрінің орынбасары Қанат Бозымбаев мүдделі министрліктерге екі күн ішінде су тасқыны салдарынан жоғалған немесе бүлінген маңызды мүліктердің орнын толтыру алгоритмін әзірлеуді тапсырды. Мұндай мүліктің тізбесіне тамақты сақтауға және дайындауға арналған заттар, тамақтануға арналған жиһаздар, ұйықтауға арналған жиһаздар, азаматтарды хабардар ету құралдары, сумен жабдықтау және жылыту құралдары кіреді. Бұл өтемақы төлеуді жергілікті атқарушы органдар бюджеттік және бюджеттен тыс қорлар есебінен жүзеге асырады» делінген таралған хабарламада.

Атап өткендей, Үкімет бұған дейін су тасқынынан зардап шеккен азаматтарға мемлекеттен қандай көмек күтетіні туралы жадынама жариялаған болатын.

«Сонымен қатар, Қанат Бозымбаевтың тапсырмасы бойынша екі күн ішінде егіс алқаптарының иелері мен судың жоғарылауынан зардап шеккен ауыл шаруашылығы тауар өндірушілеріне қаржылай көмек көрсету алгоритмі әзірленеді» деп толықтырды министрлер кабинеті.