Бозымбаев пен Ақышев «Самұрық-Қазына» қорының директорлар кеңесі құрамынан шықты

Қанат Бозымбаев пен Данияр Ақышев «Самұрық-Қазына» ҰӘҚ директорлар кеңесінің құрамынан шығарылды, деп хабарлады Қазақстан қор биржасының (KASE) сайты.

Облигациялары Қазақстан қор биржасының ресми тізімінде тұрған «Самұрық-Қазына» ұлттық әл-ауқат қорының KASE-ге хабарлауынша, жалғыз акционердің 2022 жылғы 28 қаңтардағы шешімімен «Ұлттық әл-ауқат қоры» АҚ директорлар кеңесінің құрамына өзгерістер енгізілген.

Қанат Бозымбаев пен Данияр Ақышев директорлар кеңесінен шығарылды. Орнына Тимур Сүлейменов сайланды.

Енді қордың директорлар кеңесіне алты адам кіреді: Джон Дудас, Онг Бун Хви, Лука Сутера, Әлібек Қуантыров, Алмасадам Сәтқалиев және Тимур Сүлейменов.

Айта кетсек, 2021 жылдың қарашасынан бері Қанат Бозымбаев Алматы облысының әкімі қызметін атқарса, Данияр Ақышев 2019 жылы тұңғыш президент Нұрсұлтан Назарбаевтың кеңесшісі болып тағайындалған болатын.

Тимур Сүлейменов 2021 жылдың шілдесінен бастап Қазақстан президенті әкімшілігі басшысының бірінші орынбасары қызметін атқарады.