Бортсерікті ұрып, бомба жайлы «мәлімдеген» жолаушы сот алдында ақтала алмады

Fly Arystan ұшағының бортында бортсерікті соққыға жығып, бомба туралы жалған мәлімдеме жасаған жолаушыға апелляциялық сот үкім шығарды, деп хабарлайды Orda.kz.

Оқиға 13 қаңтарда Астанадан Өскеменге бағыт алған рейсте болған. Мас ер адам бортсерікті және тағы бір жолаушыны соққыға жықты. Сонымен қатар ол бортта бомба барын «мәлімдеп» жолаушыларды дүрліктірді. Кейін ұшақтан 153 адам эвакуацияланды.

Ер адам «Терроризм актісі туралы көрінеу жалған хабар таратқаны үшін» және «Бұзақылық» баптары бойынша кінәлі деп танылып, үш жылға бас бостандығынан айырылған еді. Алайда ол сот шешімімен келіспей, апелляциялық сотқа жүгінген. Апелляциялық шағымда сотталушының адвокаты бас бостандығынан айыру жазасынан басқа жаза қолдануды сұрады.

Қылмыстық істер жөніндегі апелляциялық алқа сотталғанға қатысты үкімді өзгеріссіз қалдырды. Сот актісі заңды күшіне енді.

Еске салайық, бүгін, 7 сәуір күні Алматыда ұшқыш дауыл мен жауын шашынның әсерінен апатты жағдайда қалған ұшақты аман-есен қондырды.