Боранда жол сілтеген Қостанайлық полицей медальмен марапатталды

Қостанай облысында өмірі мен денсаулығына қауіп төндіріп, автокөліктер колоннасына қарлы боранда жол сілтеген Амантай Байжанов марапатталды. Бұл туралы бұйрыққа ішкі істер министрі Ерлан Тұрғымбаев қол қойды, деп хабарлады ORDA.

Марапаттау рәсімі І. Омаров атындағы облыстық қазақ драма театрында өтті.

— Қостанай облысы Полиция департаменті бастығының орынбасары, полиция полковнигі Ардақ Ынтықбаев Қостанай қаласы Патрульдік полиция батальонының инспекторы Амантай Байжановқа «Құқық тәртібін қамтамасыз етуге қосқан үлесі үшін» медалін табыстады, деп хабарлады облыстық баспасөз.

Сондай-ақ, Амантайдың әріптесі Әмір Шалғымбаев атап өтілді. Сол күні ол Байжановпен бірге қызметте болған. Оған Ішкі істер министрлігінің дипломы табыс етілді.

— Қызметтік борышын орындау кезінде көрсеткен батылдығы, адалдығы мен ерлігі үшін, делінген Ішкі істер министрі, полиция генерал-лейтенанты Ерлан Тұрғымбаев қол қойған бұйрықта.

Ардақ Ынтықбаев Амантай мен Әмірдің ата-аналарына алғыс хаттар табыстады, ұлдарының лайықты тәрбиесі үшін алғыс айтты.

Еске салсақ, 19 ақпанда Амантай Байжанов боранда машиналардың алдына шығып, жол көрсетіп тұрған видеосы әлеуметтік желілерде белсенді түрде таралған.