Боранбаевқа қатысты жаңа айыптау актісі жарияланды

Прокуратура кәсіпкер Қайрат Боранбаевтың тағы төрт банктегі шотын тәркілеуді талап етіп отыр.

Өткен аптада мемлекеттік айыптаушы Бауыржан Шекенов айыптау актісіне түзету енгізу үшін қосымша уақыт сұраған болатын. Бүгін, 20 наурызда прокурор жаңа айыпты оқыды. Айтылған қылмыстардың жалпы көлемі өскен жоқ.

— Боранбаевтан тәркіленуге жататын мүліктің тізімі ұлғайтылды. Айыптау қорытындысында тәркілеуге жататын төрт шот бар, - деп түсіндірді Шекенов жаңа актінің мәнін.

Жаңа құжатта прокуратура «ҚазМұнайГаз» мен «Газпром» арасындағы кездесу хаттамасына да сілтеме жасайды, оған сәйкес тараптар Дамбаровка ГАЖ арқылы Қазақстанға 1,5 миллиард текше метр ресейлік табиғи газды Ақбұлақ ГАЖ-на қосымша жеткізуге келіскен. 2019 жылдың шілде-қыркүйегі аралығында мың текше метрге 145 доллар баға болды. Айыптаушылар қазақстандық тарап ресейліктерден газдың қосымша көлемін өз бетінше сатып ала алады және бұл үшін «AsiaGazChunja» компаниясының делдалдық қызметтері қажет емес еді деген қорытындыға келді.

— Ұлттық компания мен «Газпром» компаниялар тобы арасындағы ұзақ мерзімді серіктестікке қарамастан, «ҚазТрансГаз» АҚ мен «Газпром-Экспорт» ЖШС арасында келіссөздер жүргізу және тікелей келісім-шарттар жасау арқылы газды сату және сатып алу көлемін арттырудың нақты мүмкіндігі бар. 18-тармақта көзделген шарт бойынша отырыс хаттамасына және оған қосымшаға сәйкес, сатып алуды «Газпром-Экспорттан» тікелей «ҚазТрансГаз»-ға емес, «АзияГазШонжы» делдал фирмасы арқылы жоғарылатылған бағамен жүзеге асырған, - деді Шекенов.

Адвокат Альмира Шайхина жаңа айыптау қорытындысына негізделген отырыс хаттамасы іс материалдарына қоса тіркелгенімен, заттай айғақ ретінде танылмағанын айтты. Сонымен қатар, оның айтуынша түпнұсқаның өзі емес, хаттаманың көшірмелері ұсынылған.

— Мемлекеттік айыптаудың өзі осындайға жол беретініне таң қалдым! Бұл хаттаманы айыптау қорытындысына енгізуге және сол арқылы айыпты күшейтуге қандай негіз бар?Осы арқылы сотталушылының жағдайы нашарлап, біздің  көп уақытымыз кетті. Бұл хаттаманың дәлел ретінде қабылданбайды деп танылуына толық негіз бар. Біріншіден, оны сот заттай дәлелдеме деп танымайды. Екіншіден, бұл құжатты сот ісін жүргізуге құқығы жоқ адам берген, - деді адвокат.

Қорғаушылар әлі де газды қайта сатудағы айыпталушылардың кінәсіздігін алға тартып отыр. Олардың айтуынша, кәдімгі іскерлік мәмілені қылмыс ретінде қабылдаған, енді олардың табысы жымқырылған қаржы  ретінде көрсетіліп отыр екен.