Болгариядан Қазақстанға лаңкестік топтың мүшесі экстрадицияланды

Болгариядан Қазақстанға лаңкестік топқа қатысы бар деген күдікті экстрадицияланды.

Бұл туралы Бас прокуратураның баспасөз қызметі хабарлады.

«Бүгін Бас прокуратураның, Ұлттық қауіпсіздік комитетінің, Ішкі істер министрлігі Интерполы қызметкерлері Қазақстан Республикасы Сыртқы істер министрлігінің көмегімен Қазақстан азаматын Болгария Республикасынан экстрадициялады. Ол террористік топтың әрекетіне қатысқаны үшін қылмыстық жауапкершілікке тартылды» делінген хабарламада.

Ол радикалды діни ағымды жақтаушы деген күдікке ілінген, 2015 жылы Сирия Араб Республикасы аумағына барып, лаңкестік топтардың біріне қосылған.

 Ер адам Болгарияда мамыр айында  ұсталған. Болгар тарапымен 2014 жылғы 14 қарашадағы адамдарды экстрадициялау туралы екіжақты келісімнің  арқасында күдікті Қазақстанға экстрадицияланды.

Қазір ол Астанадағы тергеу изоляторына қамалды. Оған тағылған қылмыс үшін мүлкі тәркіленіп, 8 жылдан 12 жылға дейінгі мерзімге бас бостандығынан айыру жазасы қарастырылған.