Болат Назарбаевтың ұлы 57 млрд теңгелік активінен айырылды

Активтерді қайтару комитетіне Болат Назарбаевтың ұлы Нұрбол Назарбаевқа қатысты талап-арыз түскен. Іс құпия саналғандықтан, сот отырысы жабық өтуде, деп хабарлайды Orda.kz.

Астанадағы азаматтық істер жөніндегі ауданаралық сотта Назарбаевтар әулетіне қатысты талап-арыз қаралып жатыр. Арыз Болат Назарбаевтың 41 жастағы ұлы Нұрбол Назарбаевқа қатысты жазылған болуы мүмкін. Себебі арызда «Н.Б.Назарбаев» деп көрсетілген. Дегенмен сот та, комитет те істің егжей-тегжейін жария етпей отыр.

Сот түсініктемесінде: «Аталған талап-арызда жариялауға жатпайтын, қызметтік пайдалануға арналған материалдар бар. Сондықтан процесс ашық емес» деп көрсетілген.

Айта кетейік, 8 қыркүйекте Президент Қасым-Жомарт Тоқаев жолдауында елден заңсыз шығарылған активтерді қайтарумен айналысатын комитеттің атауын өзгерту туралы ұсыныс жасаған болатын.

«Активтерді қайтару комитетін енді Инвесторлардың құқықтарын қорғау комитеті етіп өзгерту керек. Бас прокуратура заңсыз активтердің иелерімен жақсы жұмыс атқарды»,  деген еді Мемлекет басшысы.

Сол кезде көптеген саясаттанушылар мен сарапшылар бұл мәлімдемені «Ескі Қазақстан мен Жаңа Қазақстан арасындағы қақтығыстың аяқталуы» деп бағалаған.

Ашық деректерге сүйенсек, Нұрбол Назарбаев 2011–2017 жылдары Алматы облыстық ІІД-де қызмет атқарып, басшының орынбасары болған. 2017 жылдан бастап Prime Capital Holding инвестициялық қорын құрып, оның бақылау кеңесін басқарған.