Болат Назарбаевтың «оң қолына» қатысты іс жақын арада сотқа жолданады

Елдос Қоспаевтың ұйымдасқан қылмыстық тобына қатысты істі тергеу аяқталу сатысында, жақын арада сотқа жолданады.

Қаржы мониторингі агенттігінің мәліметінше, қазір 13 күдіктінің адвокаттары қылмыстық іс материалдарымен танысып жатыр.

«Нақтырақ айтқанда 508 том бар, бұл заттай дәлелдемелерді есептемегенде. Мысалы, салмағы сегіз терабайт болатын бейне және аудио жазбалар бар. Яғни, жұмыс көлемі өте үлкен және 13 күдікті бар. Оның үстіне әрқайсысының заңгері бар, барлығы іспен танысуы керек. Процесс аяқталғаннан кейін істі сотқа жібереміз»,-  деді ҚМА төрағасының орынбасары Жеңіс Елемесов.

Өткен қыркүйекте ҚМА Елдос Қоспаевты Солтүстік Кипрден Қазақстанға әкелді. Отанында оны Болат Назарбаевтың оң қолы дейді. Негізгі қашқынмен бірге қылмыстық топтың жеті мүшесі де қайтарылды. Оның құрамында барлығы 11 адам бар, олар құжаттарды қолдан жасау, рейдерлік, ұрлық және басқа да қылмыстарға қатысы бар деген күдікке ілінген. Тергеушілердің мәліметінше, қылмыстық топтың басшысы «Людоед» лақап атымен белгілі Елдос Қоспаев болған.