Болат Назарбаевтың жұбайы ұйымдастырған дүбірлі тойдан қайтқан жұп қазаға ұшырады

Алматы облысында Болат Назарбаевтың бұрынғы жұбайларының бірі Майра Құрманғалиева ұйымдастырған ат жарысы қайғылы аяқталды.

Бұл туралы Orda.kz хабарлайды.

Өткен сенбіде Алматы облысы, Райымбек ауданы, Қақпақ ауылының ипподромында Болат Назарбаевтың бұрынғы әйелі Майра Құрманғалиеваның анасының 90 жылдығына орай ат жарысы өтті.

Жарысқа Қазақстанның түкпір-түкпірінен 200-ден астам шабандоз қатысты. Жүлде қоры қомақты – бәйгенің бірнеше түрінен бірінші орын алған шабандоздарға автокөліктер уәде етілген. Дегенмен дүбірлі тойда Құрманғалиеваның өзі жоқ екені хабарланды.

Бүгін жиынға қатысып қайтып келе жатқан бір адамның мерт болғаны белгілі болды.

Райымбек ауданы әкімдігінің хабарлауынша, ерлі-зайыптылар «Шұбартал» жайлауынан қайтып келе жатқанда суға батып кеткен. Олар Құтырған өзенін өткелсіз жерден атпен кесіп өтпекші болған. Ер адам шыға алғанымен, 48 жастағы Құралай Байғоңызқызын қатты ағыс алып кеткен.