Болат Назарбаевтың қызы иелік еткен компания 47,2 млрд теңгеге мемтапсырыс алған

Болат Назарбаевтың 21 жастағы қызы иелік еткен компания 47,2 млрд теңгеге мемтапсырыс алған, деп хабарлады журналист Мият Кәшібайдың Telegram-арнасы.

«Tоlagai-2050» – бірнеше жылдан бері мемлекеттік органдардан ірі тендерлер алып жүрген жеке компания. Құрылыспен айналысады. Көбіне өзендер мен көлдерде түрлі құрылыс жүргізеді.

Қазір бұл компанияның басшысы әрі жалғыз құрылтайшысы – Оразхан Жанысбеков деген адам. Ал 2020 жылдың желтоқсанынан 2022-нің 14 ақпанына дейін компания құрылтайшыларының бірі Ақбота Назарбаева болған.

Ашық дереккөздер бойынша, Ақбота Назарбаева – экс-президент Нұрсұлтан Назарбаевтың інісі Болаттың қызы.

Мемлекеттік сатып алу порталында Болат Назарбаевтың 21 жастағы қызы иелік еткен «Tоlagai-2050» ЖШС 2018 жылдан бері 37 тендер ұтып алғанын көруге болады. Олардың жалпы құны – 47,2 млрд теңге.

Ақбота Назарбаева ресми түрде компания құрылтайшысы атанардан бір ай бұрын, яғни, 2020 жылы қарашада «Tоlagai-2050» Төтенше жағдайлар министрлігіне қарасты «Қазселденқорғау» мекемесімен 22,1 млрд теңгеге келісімшарт жасасты. Бұл - компания тарихындағы ғана емес, Қазақстан тарихындағы ең ірі мемтапсырыстардың бірі.

Бюджеті 22,1 млрд теңге болатын келісімшартқа сәйкес, «Tоlagai-2050» Алматы облысы Қарасай ауданындағы Ақсай өзеніне селді ұстап тұратын бөгет салуы тиіс.

21 жастағы Ақбота Назарбаева «Tоlagai-2050»-ден бөлек, тағы да бірнеше компанияға құрылтайшы. Солардың бірі – Шымкеттегі «Мирас» университеті. Назарбаева былтырғы мамырдан биылғы ақпанға дейін осы университет құрылтайшыларының бірі болған.