Болат Назарбаевқа тиесілі болған зауыт ақыры мемлекетке қайтарылды

Бұрын Болат Назарбаевқа тиесілі болған  Алматы ауыр машина жасау зауытының жылжымайтын мүлкі мемлекетке қайтарылды деп хабарлайды Orda.kz.

Бас прокуратураның мәліметінше, сот шешімі бойынша кәсіпорынға 37 гектардан астам жер және жалпы ауданы шамамен 80 000 шаршы метр болатын 94 коммерциялық нысан қайтарылды. Алматы прокуратурасы бұл мүліктердің заңсыз сатылғанын анықтап, мәмілелердің жарамсыз деп танылуына қол жеткізді. 

«Зауыт мүлкінің заңсыз сатылғаны анықталды. Қадағалау актісін орындау аясында мемлекеттік мүлік және жекешелендіру комитеті мәмілелерді жарамсыз деп тану туралы сотқа талап-арыз берді. Сот талапты қанағаттандырды, апелляция бұл шешімді күшінде қалдырды»,  деп мәлімдеді қадағалау органы.

ААМЖЗ бұған дейін Болат Назарбаевтың бақылауында болған. 2023 жылғы наурызда Жоғарғы сот экс-президенттің марқұм болған бауырын мемлекетке ААМЖЗ -нің 31,9% акциясын қайтаруға міндеттеді. Ол бұл акцияларды 2007 жылы сатып алған, алайда келісімшарт шарттары орындалмағандықтан, мәміле жарамсыз деп танылды. Толығырақ сілтеме бойынша.

Қызығы, Egov пен «Компре» жүйелерінде құрылтайшылар туралы мәліметтер жасырылған. ААМЖЗ -нің ресми сайтында зауыттың екі ірі акционері бар деп көрсетілген. Нұрбол Назарбаев (2010 жылдан бері, 50% акция) және Эдгар Салдузи (2020 жылдан бері, 50%).