Болат Назарбаев 299 мың гектар жерінен айрылды

Маңғыстау және Жамбыл облыстарында экс-президенттің інісінің компанияларына тиесілі жер учаскелері анықталды.

«АМАНАТ» партиясы жанындағы Мемлекеттік басқаруды дамыту және сыбайлас жемқорлыққа қарсы іс-қимыл кеңесінің төрағасы Ерлан Сайыров Маңғыстау облысындағы 239 мың гектар, Жамбыл облысындағы 60 мың гектар жер мемлекет меншігіне қайтарылғанын мәлімдеді. Еншілес компаниялар арқылы жер учаскесі Болат Назарбаевтың меншігінде болған.

- Біздің партияның басты миссиясы – жекенің қолына заңсыз өтіп кеткен ұлттық байлықты қалпына келтіру. Біз бұл жұмысты жүйелі түрде жүргізетін боламыз. Тегінің асылдығы, сіңген еңбегі мен әмиянның қалыңдығы әділдікті қалпына келтіруге кедергі емес. Халықтан алып кетті ме? Қайтарсын! – деді Ерлан Сайыров.

Айта кетейік, бұған дейін жалпы көлемі 244 мың гектарды құрайтын 59 жер телімі мемлекет меншігіне қайтарылған болатын. Осындай ұлан-ғайыр қазақ жерінің иесі Нұрсұлтан Әбішұлы Назарбаевтың інісі күмәнді жағдайда болды. Аталған жерлер Қаскелең, Талғар, Астана және Түркістан облысында орналасқан. Құжаттарға сәйкес, олар коттедж қалашығы, әкімшілік ғимарат және базар салу үшін сатып алынған. Заңсыз алынған жерлер жүздеген миллион долларға бағаланады.