«Болашақ» шахтасында зардап шеккендердің бірі ауруханада қайтыс болды

Ақтөбе облысындағы «Болашақ» шахтасындағы апат кезінде зардап шеккен жұмысшылардың біреуі жансақтау бөлімінде қайтыс болды, деп хабарлайды Orda.kz.

Ақпаратты Ақтөбе облысының денсаулық сақтау басқармасынынң баспосөз қызметі растады.

«Науқаста полиорганды жеткіліксіздік диагнозы қойылды, оны санитарлық тікұшақпен көпсалалы облыстық ауруханаға шұғыл жеткізді. Алайда ол қайтыс болды» деп жазылған хабарламада.

«Қазхром» АҚ баспасөз қызметі компания марқұм қызметкердің отбасына 10 жылдық орташа жалақысы мөлшерінде қолдау көрсететінін хабарлады.

«Әлеуметтік және материалдық қолдау көрсету үшін, оның ішінде моральдық зиян үшін өтемақы ретінде марқұмның туыстарына қызметкердің 10 жылдық орташа жалақысы мөлшерінде төлем жасалады, сондай-ақ жерлеу шараларын ұйымдастыру үшін қаржылай көмек беріледі. Сонымен қатар, компания балалардың білімін төлеуді өз мойнына алып, қажет болған жағдайда отбасы мүшелерінің бірін жұмысқа алуды қамтамасыз етеді. Сондай-ақ, отбасы Қазақстан Республикасының еңбек міндеттерін орындау кезінде жұмысшылардың өндірістік жарақаттардан міндетті сақтандыру туралы заңына сәйкес төлемдер алады», деп мәлімдеді «Қазхром».

Төтенше жағдай 28 ақпанда «Болашақ» шахтасының өндіру блогында бұрғылау жұмыстарын жүргізу кезінде болған.