Болашақ бағдарламасымен оқуға түсушілерге қойылатын басты талаптар

Білім және ғылым министрлігінің ақпарат жиналысында «Халықаралық бағдарламалар орталығы» АҚ президенті Айнұр Қарбозова  «Болашақ» стипендиясына құжаттар қабылдау барысы және атқарылып жатқан жұмысы туралы баяндады.

Ол 2020 жылы 6 мамырда Үкімет Қаулысымен бекітілген жаңа іріктеу ережесіне сәйкес сапалық өзгерістер шеңберіндегі барлық үміткерге ортақ талап қойылатындығын айтты.

— Басым мамандықтар тізбесінен мамандығы бойынша ұсынылатын ЖОО тізіміне енгізілген шетелдік ЖОО-дан шартсыз шақырудың болуы. Бұл – бірінші талап. Екіншіден, мемлекеттік тілді игеру көрсеткіші Қазтестің кемінде В1 көрсеткішін алу. Яғни, 105 сұрақтың кемінде 105-іне дұрыс жауап беру керек, -деді Айнұр Қарбозова.

Қарбозованың  сөзінше 2021 жылы «Болашақ» бағдарламасы шеңберінде 5 оқу бағдарламасы ұсынылған. Оның ішінде магистратура, ауылды жерлерден қатысатындар үшін магистратура, медицина үшін резидентура, докторантура және тағылымдама.

 — Тағылымдаманың шетелде кадрларды даярлау республикалық комиссиясының шешімімен 6 санаты бекітілді. Олар – ғалымдар, педагогикалық, денсаулық сақтау, инженерлік-техникалық қызметкерлер, мемқызметшілер және мәдениет пен спорт саласы қызметкерлері, - деді Айнұр Қарбозова.

Бұл бағытта ағымдағы жылы бөлінген шекті стипендия саны – 1 055. Оның 555-і академиялық магистратура, докторантура, резидентура және тағылымдаманың 5 санатына бөлінеді. Қалған 500 стипендия ғалымдарға бөлініп отыр.

4 мамырда басталған құжат қабылдау процесі 28 қазанға дейін жүргізіледі, яғни қазіргі уақытта құжат қабылдау жүріп жатыр.