Boeing апаты: Тоқаев Индонезия Президентіне көңіл айтты

Қасым-Жомарт Тоқаев Индонезия Президенті Джоко Видодоға Sriwijaya Air ұшағының апатқа ұшырауына байланысты көңіл айту жеделхатын жолдады, деп хабарлайды Ақорда.

«Мен осы жан түршігерлік апатта жақындарынан айрылған отбасылардың ауыр азабымен бөлісемін. Құдай оларды қайғы-қасірет кезінде батасын беріп, жұбатып, құрбан болғандардың жанын өзінің сүйіспеншілігі мен мейірімімен жарылқасын», - делінген жеделхатта.

9 қаңтарда Sriwijaya Air ұшағы суға құлап кеткен. Апатқа ұшыраған Sriwijaya Air жолаушылар ұшағында 62 адам болған. Boeing компаниясы Индонезияның авиакомпаниясымен байланыста екенін және қажетті көмек көрсетуге дайын екенін айтты.

Индонезия құтқарушылары Ява теңізінен жексенбі күні таңертең дене бөліктерін, киім-кешек пен металл қалдықтарын шығарды. Фрагменттерді құтқару және іздеу тобы Ланканг пен Лаки аралдары арасынан тапты.