Боди массаж арқылы 2 млрд тапқан астаналық бикеш ұсталды

Астанада боди массаж арқылы жезөкшелікпен айнылысып, 2 млрд тапқан бикеш анықталды, деп хабарлайды Orda.kz.

2021-2023 жылдар аралығында бикеш притон ұйымдастырып, 2 млрд көлемінде қаржы тапқан. Жезөкше ақша аударымдары үшін туыстары мен сенімді адамдарының банктік деректемелерін пайдаланып отырған. Сондай-ақ бикештің құрастырған схемасы да анықталды.

Қылмыстық табысты заңдастыру мақсатында жезөкше өзінің атына ЖШС ашып алып, ауыл шаруашылығы дақылдарын сатып алып, қайта сатқан. Осылайша, ол 88,5 млн теңгені заңдастырып, жалпы 95 млн теңге қылмыстық табысқа қол жеткізген.

ҚМА-ның тергеуі бойынша қылмыстық жолмен алынған қаражатқа күдікті:

• 350 млн теңгеге салынып жатқан ауданы 500 ш.м. коммерциялық үй-жай;
• 92 млн теңгеге өз баласына күтім жасап жүрген жалдамалы қызметкерге тіркелген жалпы ауданы 329,1 ш.м. 5 екі бөлмелі пәтер;
• 667,5 млн теңгеге Астана қаласында жалпы ауданы 784 ш.м. жер учаскелері бар екі коттедж;
• 335,4 млн теңгеге елорданың элиталық тұрғын үй кешендерінде жалпы ауданы 292 ш.м. 2 пәтер мен тұрақ орын;
• 114 млн теңгеге G63 маркалы Mercedes Benz автокөлігін сатып алған.

Сонымен қатар, тінту кезінде 50 млн теңге мен бағалы зергерлік бұйымдар табылып, олар бұғатталды.

Тергеудің басталғанын білген күдікті тәркілеуден жалтару мақсатында 5 бөлмелі 2 пәтерін сатып жіберген. Дәлірек айтқанда, 143,5 млн теңгеге қайта сатып 51,5 млн теңге қосымша қылмыстық табыс тапқан.

Сот үкімімен ол жезөкшелікпен айналысу үшін притон ұйымдастырғаны және қылмыстық жолмен алынған қаражатты заңдастырғаны үшін (ҚР ҚК 309-бап, 218-бап 3-тармағы) 6 жылға бас бостандығынан айырылып, мүлкі мен пәтерлерді сату арқылы алынған ақшасы тәркіленді.