Блогерлерге букмекерлік кеңселерді жарнамалауға тыйым салынады

Енді блогерлер букмекерлік кеңселерді жарнамалай алмайтын болды, деп хабарлайды Orda.kz порталы.

Құмар ойындар, лотерея және лотерея қызметі туралы заңға енгізілген өзгерістер ішінде блогерлердің букмекерлік кеңселерді жарнамалауына да тыйым салатын заң бар. Бұл туралы Мәжілістің жалпы отырысында депутат Елнұр Бейсенбаев мәлім етті.

Ол Қазақстанда құмар ойындарға тәуелділіктің ауқымды болуына жарнамаға шектеудің жоқтығы себеп болғанын атап өтті. Заң қабылданды, енді  танымал блогерлер немесе инфлюенсерлер өздерінің әлеуметтік желілері арқылы букмекерлік кеңселер мен казиноларды жарнамалай алмайды.

«Олардың мұндай құқығы болмайды. Ол үшін Әкімшілік құқық бұзушылық туралы кодекске арнайы норма енгізіп, 60 АЕК көлемінде айыппұл салуды қарастырдық. Блогерлер спорттық іс-шараларға қатысуы мүмкін, бірақ олардың барлығы букмекерлік кеңселерді жарнамалау құқығынан айырылады. Олардың оқиғаны әлеуметтік желілерде көрсету мүмкіндігі ғана болады, бірақ шектеу (букмекерлік кеңселерді жарнамалауға) бар», - деді Бейсенбаев.

Мәдениет және ақпарат вице-министрі Қанат Ысқақов енді онлайн казинолар мен онлайн лотереяларды жарнамалауға тыйым салынғанын қосты.

«Біз барлық жұмыстарды бұғаттап, жауапкершілікке тартуды қамтамасыз еттік. Бұл жұмысты жалғастырамыз», - деді Ысқақов.