Блогер Жаңабылов сотта «Zhana Business» курсынан қанша табыс тапқанын айтудан бас тартты

Астананың мамандандырылған ауданаралық әкімшілік сотында блогер Ерболат Жаңабылов пен оның жары Эльмира Төлегеноваға қатысты процесс басталды. Блогерге қатысты eOtinish платформасы арқылы 8 шағым түскен, деп хабарлайды Orda.kz. 

Сотта туризм және спорт министрлігінің өкілдері 21 тамыз бен 2 қыркүйек аралығында Жаңабыловтың әрекетіне байланысты eOtinish платформасы арқылы сегіз шағым түскенін айтты.  

Сот отырысында судья Малика Ноғайбекова блогерден Zhana Business атты оқу курсы мен көлік ұтысынан қанша қаржы түскенін, курстың құрылымы мен жүйесін жасаған адамның еңбекақысын атауды сұрады. Алайда Ерболат Жаңабылов жауап беруден бас тартты. 

Сонымен қатар, Ерболат Жаңабыловтың адвокаты Олег Чернов сот процесі барысында оның құқықтары бұзылғанын айтып, сот отырысына прокурорлардың қатысуын талап етті. Ал блогердің жұбайы Эльмира Төлегенова сотта куәлік беруден бас тартты.

Еске салай кетейік, тамыз айында Instagram әлеуметтік желісінде Жаңабылов пен Төлегенованың парақшасында 10 автокөлік ойнататыны жайлы жазба жарияланды. Жазбада көлік Zhana Business ақылы оқу курсын 30 мың теңгеге сатып алғандардың арасында ойнатылатыны айтылған.

Артынша, бұл жағдай әлеуметтік желілерде сынға ұшырап, мемлекеттік органдарға шағымдар түскен. Кейін Туризм және спорт министрілігі тексеріс жүргізілгенін және материалдардың сотқа жолданғанын айтты. Айта кетейік, еліміздің заңнамасына сәйкес, лотереяны тек ресми операторлар мен олардың агенттері ғана өткізе алады. 

Ерболат Жаңабыловтың ісі әкімшілік құқық бұзушылық туралы кодекстің 445-1-бабы «Лотереялар және лотерея қызметі туралы заңнамасын бұзу» бойынша ұаралып жатыр.  

Келесі сот отырысын судья Малика Ноғайбекова істі қарауды 15 қыркүйек күні сағат 15:00-ге қалдырды.