Блогер Daricorn буллингке ұшыраған баладан кешірім сұрады

Әнші, модель және блогер Дариға Нұркеева (Daricorn) жариялаған видеода баланың сөзіне қате субтитрлер қосылғаннан кейін, буллингке ұшыраған баланың отбасынан кешірім сұрады, деп хабарлайды Orda.kz.

Нұркеева кешірім сұраған видеоны өзінің Instagram парақшасында жариялады.

«Көпшілік біздің жағдайымыздан хабардар. Бүгін біз кездесіп, бәрін талқыладық. Тағы да бәріңізден кешірім сұраймын. Бұл біз үшін, бүкіл Қазақстан үшін үлкен сабақ болды — ересектердің рұқсатынсыз кішкентай балаларды бейнежазбаға түсіріп, әлеуметтік желіге жариялауға болмайды. Біз толық жауапкершілікті өз мойнымызға аламыз», — деді блогер.

Еске салсақ, дау баланың анасы Ольга Колузанованың мәлімдемесінен кейін шыққан еді. Ол Daricorn-ның кәмелет жасына толмаған ұлын ата-анасының келісімінсіз кафе жарнамасына түсіргенін айтқан. Бейнеролик әлеуметтік желілерге жарияланғаннан кейін, жасөспірімді құрдастары кемсіткен еді.