Блогер Әбиев 7 жылға бас бостандығынан айырылды

Атышулы блогер Тоқберген Әбиев бопсалағаны үшін 7 жылға бас бостандығынан айырылды, деп хабарлайды  Orda.kz. Астананың қылмыстық істер жөніндегі мамандандырылған ауданаралық сотына сілтеме жасап.

4 тамызда Астанада Әбиевке аса ірі көлемде бопсалау фактісі бойынша сот үкімі шықты. 2020 жылдың маусым айынан бастап блогер YouTube арнасында шындыққа сәйкес келмейтін және ЖШС іскерлік беделіне нұқсан келтіретін ақпараты бар бейнероликтерді жариялап келген.

Кейінірек фирма заңгерінің YouTube сайтынан барлық бейнежазбаларды өшіру туралы талабы бойынша Әбиев оларды жойғаны үшін 50 миллион теңге талап еткен.

Әбиевтің кінәсі жәбірленуші тарап өкілінің, куәгерлердің айғақтары, ұялы телефон арқылы хат алмасу, сыртқы және ішкі бақылау камераларының бейнежазбалары, сараптама қорытындылары, заттай айғақтармен дәлелденген.

Прокурор Әбиевті 9 жылға бас бостандығынан айыруды сұрады. Қорғаушы тарап ақтауды сұрады.

Істі алқабилер алқасы айыпталушының өтініші бойынша істі қарады. Алқабилердің қатысуымен болған сотта  Әбиев аталған қылмыстық құқық бұзушылықтарды жасағаны үшін кінәлі деп танылды. Сот қылмыстық жауаптылық пен жазаны жеңілдететін мән-жай ретінде сотталушының жас балалары бар екенін анықтады. Сот қылмыстық жауаптылықты ауырлататын мән-жайларды анықтаған жоқ. Бап санкциясы мүлкі тәркіленіп, 7 жылдан 15 жылға дейінгі мерзімге бас бостандығынан айыру түріндегі жазаны қарастырады.

Сот үкімімен Тоқберген Әбиев кінәлі деп танылып, жазасын орташа қауіпсіздіктегі қылмыстық-атқару жүйесі мекемесінде өтеу үшін 7 жылға бас бостандығынан айырылды. Үкім заңды күшіне енген жоқ.

Еске салсақ, 14 желтоқсанда Әбиев 50 миллион теңге алғаннан кейін ұсталған болатын.

«Әділ сөз» халықаралық сөз бостандығын қорғау қоры 2013 жылы журналист Тоқберген Әбиевті «қара тізімге» енгізген. Мұның бәрі оның өз әрекетіне назар аударту үшін «өзін ұрлау» ісін ұйымдастырғанына қатысты. Кейін Тоқберген Әбиев жемқор шенеуніктердің жаңа жылын осы «адам ұрлау» ісімен бүлдіргісі келгенін мойындады.

2018 жылы Тоқберген Әбиев Ақтаудағы саунада түсірілген видеосы үшін бір жылға бас бостандығынан айырылған болатын. Бейнежазбаға қатысқандар, оның ішінде Әбиев те  «жемқорлықпен күресеміз» деп уәде берген.