БҚО тұрғыны өзінің «қайтыс болғанын» банк қызметкерінен естіді

БҚО Жаңақала ауданының тұрғыны Айтасова Гүлайна банктегі несиесін төлеу кезінде өзінің 4 маусымда Астана ауруханасында қайтыс болып кеткенінен хабар алады.

Бұл туралы Мой город хабарлады.

«Несиемді төлейін деп ақша аударған едім, ол өзіме қайтып келді. Сосын банк операторына хабарластым. Ол маған «сіз 4 маусымда Астанадағы ауруханада қайтыс болғансыз, маған осылай шығып тұр» деді. Енді несие төленбеген соң, өсімпұл қосылып кете ме деп уайымдап отырмын. Бірақ жалақымды алдым, шоттарым ашық. Мен Жаңақала ауданы бойынша тірі адаммын», - дейді тұрғын. 

Сонымен қатар Айтасова Гүлайна қан қысымы сырқаты бойынша бұрыннан есепте тұрғаны мәлім болды. Қазір аурухандан дәрі алайын десе, дәрігерлер оған «қайтыс болғанын» айтқан. 

«Шілденің 4 -де Астанадағы медициналық мекемеде әйел қайтыс болды. Медициналық ұйым қызметкерлері мәліметтерді базаға енгізу барысында ЖСН-нің бір санынан қате жіберген. Қайтыс болған адам деп  Батыс Қазақстан облысының тұрғыны тіркеліп кеткен. Кеткен қателікті дәл сол медициналық ұйым түзетеді», - деп түсіндірді Халыққа қызмет көрсету орталығының өкілдері.