БҚО-да жантүршігерлік жол апатынан 2 адам көз жұмды

Самара – Шымкент тас жолының Барбастау ауылы маңында ВАЗ-2112 және Volkswagen Passat көліктері соқтығысты. Жол апаты салдарынан екі әйел қаза тапты, деп хабарлайды Orda.kz. 

Куәгерлердің айтуынша, апат салдарынан екі адам – шетелдік автокөлік жолаушысы мен ВАЗ көлігінің жүргізушісі көз жұмды. 

Батыс Қазақстан облысының полиция департаменті апат фактісін растады.

Алдын ала мәлімет бойынша, ВАЗ-2112 жүргізушісі көлік тізгініне ие бола алмай, қарсы бағытқа шығып кетіп, Volkswagen Passat көлігімен соқтығысқан. Жүргізуші мен екі жолаушы түрлі дене жарақаттарымен ауруханаға жеткізілді.

Аталған дерек бойынша қылмыстық іс қозғалып, сотқа дейінгі тергеп-тексеру амалдары жүргізіліп жатыр. Жол-көлік оқиғасының мән-жайы мен себептері нақтылануда.

Айта кетейік, 18 желтоқсан күні полицияға «Highvill» тұрғын үй кешені аумағынан ер адамның денесі табылғаны туралы хабар түсті.