БҚО-да кәмелетке толмаған қызды зорлады деген күдікке ілінген шенеунік қайтыс болды

Әлеуметтік желілерде 16 наурыз күні Шыңғырлау ауданында кәмелетке толмаған қызды зорлады деген күдікпен қамауға алынған шенеуніктің қайтыс болғаны туралы ақпарат тарады. Тараған мәліметтерде марқұммен қоштасу рәсімі 19 наурызда өтетіні айтылған, деп хабарлайды Orda.kz 

Еске салайық, оқиға Шыңғырлау ауданында болған. Алғашқы мәлімет бойынша, полицияға жәбірленуші қыздың әкесі жүгінген. Оның айтуынша, 2 қаңтар күні ер адам оның кәмелетке толмаған қызын алдап үйіне шақырып, зорлаған.

Сол кезде БҚО полиция департаменті баспасөз қызметі бұл ақпаратты растап, аталған дерек бойынша ҚР ҚК 120-бабы «Кәмелетке толмағанды зорлау» бойынша қылмыстық іс қозғалғанын хабарлаған болатын.

Кейін құқық қорғау органдары тергеу барысында хат алмасулар мен басқа да материалдарды зерттеп, кәмелетке толмағанға қатысты зорлық фактісі анықталмағанын мәлімдеді. Ал 16 жастағы қыз бен оның анасы күдіктіге ешқандай шағымдары жоқ екенін айтып, қарым-қатынас өзара келісіммен болғанын жеткізген.

Алайда қыздың әкесі бұл ақпараттың шындыққа сәйкес келмейтінін мәлімдеді. Полицияда қылмыстық іс бойынша тергеу жалғасып жатқаны хабарланды. 27 ақпанда БҚО прокуратурасы күдіктінің ұсталып, уақытша ұстау изоляторына қамалғанын мәлімдеген. Айта кетейік, күдікті Шыңғырлау ауданы әкімдігінің бөлімдерінің бірінде жұмыс істеген. Арыз түскеннен кейін ол қызметінен босатылған.

Оқи отырыңыз:

• Көктемгі әскерге шақыру басталды: 21 мыңнан астам азамат сарбаз атануға міндетті
• Тоқаев: «Тағдыршешті сәтке куә болдық»