БҚО-да 2 адамды қағып кеткен шенеунік жұмыстан қуылды

Ірі жол-көлік оқиғасын жасаған Батыс Қазақстан облысы әкімдігі аппаратының қызметкері қызметінен босатылды, деп хабарлайды Orda.kz.

«Мой город» мәліметінше, жол-көлік оқиғасына себепкер болған ер адам -  Батыс Қазақстан облысы әкімдігі аппаратының қызметкері Ербол Найзабеков.

Ербол Найзабеков мас күйінде рөлге отырып, бағдаршамда тұрған үш көлікті соққан. Найзабеков Volkswagen Tiguan көлігінің жүргізушісі бағдаршамда тұрған Mercedes көлігіне соқтығысқан. Соққыдан Mercedes көлігі «ВАЗ» және Skoda Rapid көліктерімен соқтығысты. Салдарынан таксиде болған 18 жастағы студент зардап шегіп, ауыр жарақат алды. Бастапқы диагнозы - миы шайқалған, жұлын контузиясы, омыртқа жарақатын алған, қыздың мүгедек болып қалу қаупі бар.

 Батыс Қазақстан облысы әкімдігінің баспасөз қызметі мемлекеттік қызметшілердің қызметтік этика стандарттарын бұзғаны үшін Найзабековке тәртіптік жаза ретінде қатаң сөгіс берілгенін хабарлады. Сонымен қатар, оның қазіргі уақытта қызметінен босатылғаны айтылды.

«Найзабековке қатысты әкімшілік құқық бұзушылық кодексінің 608-бабы бойынша әкімшілік іс қозғалды, тиісті сараптамалар тағайындалды. Тергеу нәтижелері бойынша жол-көлік оқиғасы туралы іс материалдары сотқа жіберілетін болады» деп толықтырды әкімдік.