«Біздің заманның батыры»: Денсаулық сақтау министрлігі Астанада зардап шеккен фельдшер туралы пікір білдірді

Денсаулық сақтау вице-министрі Тимур Мұратов Астанадағы тұрғын үйдің қасбеті құлаған кезде жарақат алған жедел жәрдем фельдшерінің әрекетін жоғары бағалады, деп хабарлайды Orda.kz.

«Нәзік қыз үйінділердің астында біреудің көмекке мұқтаж екенін көріп, құтқаруға асықты. Оның әрекеті қазіргі дәрігерлердің бет-бейнесі болды. Менің ойымша, ол қолынан келгеннің бәрін жасады және ең дұрыс шешім қабылдады», – деді денсаулық сақтау вице-министрі.

Тимур Мұратов фельдшерді «біздің заманның батыры» деп атады. Қазіргі таңда ол бас миының ауыр жарақатын алған. Сонымен қатар, мұрын сүйегі мен басының артқы жағы сынған. Жарақат алған екінші дәрігер нейрохирургия бөлімінде жатыр.

Айта кетейік, 8 қараша күні Астана қаласының Алматы ауданында Тәуелсіздік даңғылы, 24Б мекен-жайы бойынша 9 қабатты тұрғын үйдің қасбетінен сыртқы кірпіш қаптамасы мен кондиционерлік қондырғы құлаған. Зардап шеккендер ауруханаға жеткізілген.