Хабиб Дағыстан халқы атынан үндеу жасады

UFC-дің бұрынғы чемпионы Хабиб Нурмагомедов Мәскеу метросындағы жас жігітті ұрып-соғу оқиғасынан кейін дағыстандықтардың атынан үндеу жасады.

Бұл туралы Orda.kz хабарлайды.

– Біреу такси жүргізушісін алдап кетсе, дағыстандық болып шығады. Біреу біреуді ұрса оны да дағыстандық деп жазады. Бізде де сезім бар, дағыстандықтардың саны төрт болмаса да үш жарым миллион адамға жуық. Менің ойымша, бір адам қателескен кезде – барлық БАҚ дағыстандықтар деп жазғаны дұрыс емес, - деді ол.

Спортшы әр ұлттың ішінде зиялы қауым, ғалымдар мен дәрігерлер бар екенін айтты.

4 қазан күні 3 дағыстандық азамат Мәскеу метросында бір жігітті ұрған. Жәбірленушінің айтуынша, ол жаңадан келгендер тарапынан қорлық көрген қызды жақтамақ болған. 6 қазанда Ибраһим Мусалиев, Хасан Залибеков және Мағамәли Ханмагомедов бұзақылық қылмыстық іс бойынша екі айға қамауға алынды.