Біз президент Тоқаевқа сенуіміз керек – Ғалымжан Жақиянов

«Қазақстанның демократиялық таңдауы» қозғалысы құрылтайшыларының бірі, Павлодар облысының бұрынғы әкімі және саясаткер Ғалымжан Жақиянов президент Қасым-Жомарт Тоқаев туралы ойларымен бөлісті.

«Гиперборей» YouTube арнасына берген сұхбатында Жақиянов президент Тоқаевты қолдайтынын айтты.

– Бұл ретте біз президент Тоқаевқа сенуіміз керек. Ол біраз мәселені шешем деп айтты. Ол біздің мемлекетті жаңғыртады. Қазір, дәл осы сәтте, өзі сөйлеп отырған елдің жаңаруы туралы жақсы ниеті бар деп сенуіміз қажет, – деді Жақиянов.

Ғалымжан Жақиянов – әртүрлі уақытта бірқатар мемлекеттік қызметтерді атқарды: Семей облысының әкімі болды, Қазақстан Республикасы Стратегиялық ресурстарды бақылау агенттігін басқарды. 1997-2001 жылдары Павлодар облысының әкімі болды.

2001 жылдың қарашасында Жақиянов оппозициялық «Қазақстанның демократиялық таңдауы» (ҚДТ) қоғамдық бірлестігін құрды. Бірнеше күннен кейін ҚДТ-ның барлық құрылтайшылары қызметтерінен шеттетілді. Кейін ол «Қазақстанның демократиялық таңдауы» республикалық қоғамдық бірлестігінің құрылуына байланысты (ұйым Қазақстан Республикасында экстремистік деп танылды) қызметінен босатылды. Ғалымжан Жақиянов 2002 жылы 13 мың долларды жымқырды деп айыпталып, жеті жылға сотталған.

2005 жылы Қазақстанда президент сайлауы қарсаңында ҚДТ сот шешімімен таратылды. Ал 2006 жылдың 14 қаңтарында Ғалымжан Жақиянов шартты түрде мерзімінен бұрын босатылды.