Биылғы аптап ыстық Еуропаның электр жүйесін теңселтті 

Еуропада атом электр станциялары аптап ыстық салдарынан қуатын азайтуға мәжбүр, деп хабарлайды Orda.kz Financial Times-қа сілтеме жасап. Электр жүйесіне қатты салмақ түсті, өйткені кондиционер қолдану күрт артты.

«Биылғы жазда Еуропаның энергетикалық жүйелері үлкен қысымға ұшырады. Ыстық ауа райы электр энергиясына деген сұранысты арттырып, кейбір зауыттар жұмысын уақытша тоқтатуға мәжбүр етті. Маусым айы Батыс Еуропада бақылау тарихындағы ең ыстық ай болды, бұл кондиционерлерге сұраныстың өсуіне және электр энергиясы бағасының күрт көтерілуіне әкелді» деп жазады басылым. 

Eurelectric Еуропалық энергетиктер қауымдастығының мәліметінше, 23 маусым мен 3 шілде аралығында байқалған ыстық толқыны кезінде ЕО-дағы электр энергиясына жалпы сұраныс өткен жылдың осы кезеңімен салыстырғанда 7,5%-ға өскен.

Испанияда бұл көрсеткіш 16%-ға жетті. Бұл елде ауа температурасының күрт көтерілуінен мыңға жуық адам өмірімен қоштасты.

Франция мен Швейцариядағы ішкі  АЭС-тер жаздың басында уақытша тоқтап немесе қуатын азайтты, себебі реакторларды салқындату ыстықта қиындай түскен.

Басқа елдердегі жағдай

Ұлыбританияның SSE энергетикалық компаниясы маусым айының соңында гидроэлектростанцияларындағы өндіріс көлемі алдыңғы тоқсанмен салыстырғанда 40%-ға қысқарғанын мәлімдеді. Елде қатты ыстық пен құрғақшылық болды.

2025 жылғы шілденің соңында Түркияның Мерсин мен Карабук провинцияларында аптап ыстық салдарынан ауқымды орман өрті болды. Салдарынан 13 адам қаза тауып,1300-ден астам тұрғын шұғыл эвакуацияланды.

Ғалымдар 2100 жылға қарай ғаламдық орташа температура 29°C-тан асуы мүмкін деп ескертеді. Бұл адам өмірі үшін оңтайлы ауа температурасынан - ол 13-тен 25 ° C-қа дейін жоғары.