Биылғы мектеп түлектері қорытынды емтихан тапсыратын болды

Білім және ғылым вице-министрі Шолпан Қарынова ОКҚ өткен онлайн-брифингте БАҚ өкілдерінің сұрақтарына да жауап берді.

Сауалдар арасындағы «Пандемияға байланысты биыл 9 -11 сынып оқушылары қорытынды емтихан тапсырудан босатыла ма?» деген сұрақтың жауабын көпшілік күткен еді. Шолпан Қарынова биыл қорытынды аттестацияның болатынын айтты.

— 9 -11 сынып түлектерін үшінші тоқсаннан бастап оқыту туралы шешім 9 сыныптардың да, 11 сыныптардың да емтихан тапсыратынына байланысты қабылданды. Сондықтан біз дайындалып жатырмыз. Оқушылар, мектептер бірыңғай қорытынды емтихандарға дайындалуда. Бұл емтихандар қажет. Қорытынды аттестация - негізгі мектепті және орта мектепті бітіргендігі туралы куәлік алуға құқық береді. Сол себепті біз биыл қорытынды аттестация болуы керек деп есептейміз. Бүгінде осыған орай білім және ғылым министрлігінің бұйрығы дайындалып жатыр, - дейді Қарынова.

Вице-министрдің айтуынша 9 сынып оқушылары үш емтихан тапсырады, ол — қазақ, орыс тілдері және математика пәндері. Ал 11 сынып оқнушылары төрт емтихан тапсырады. Сонымен бірге вице-министр эпидемиологиялық ахуалға байланысты жеке шешімдер қабылданатынын да ескертті.

Бұған дейін еліміздің бас санитар дәрігері Ерлан Қиясовтың жаңа қаулысы шықан болатын, оған сәйкес, төртінші тоқсанда бітіруші сыныптар пәндердің 70 пайызын штаттық режимде оқитыны белгілі болды.