Биылғы халық санағы сандық жүйеге көшіріледі

ҚР Стратегиялық жоспарлау және реформалау агенттігі төрағасы Қайрат Келімбетов 2021 жылғы халық санағы қалай өтетінін мәлімдеді, деп хабарлайды ORDA.kz ҚазАқпарат-қа сілтеме жасап.

— Бұл мәселе жақында реформалар жөніндегі Жоғарғы кеңесте қаралды. Әзірге біздің болжамдарымызға сүйене отырып, эпидемиологиялық жағдайға қарай халық санағын 1 қыркүйектен қазан айының соңына дейін өткізу шешімі қабылданды. Яғни, санақ шамамен 2 айға созылады. Санақ жүргізу жөніндегі арнайы мемлекеттік комиссия құрылды, оны Премьер-Министрдің бірінші орынбасары Әлихан Смайылов басқарады. Қазір де комиссияның бірнеше отырысы өтті, - деді Қайрат Келімбетов Орталық коммуникациялар қызметінде өткен баспасөз мәслихатында.

Былтырғы санақтармен салыстырғанда биылғы санақты барынша цифрландыру көзделіп отыр.

— Яғни, 1 қыркүйектен 15 қазанға дейін Ұлттық статистика бюросының арнайы сайты ашық тұрады – sanaq.gov.kz. Бұл санақ аясында барлық сұрақтарға онлайн жауап беруге мүмкіндік бар. Қазанның соңғы екі аптасында санақшылар тұрғындардың үйлерін аралап, планшет арқылы ыңғайлы форма толтыратын болады. Жалпы, біз халық санағын өткізуге дайындалып жатырмыз. Өз уақытында тиісті қаражат бөлінді, олар резервке қойылды және бюджетті нақтылау аясында Ұлттық статистика бюросына да, негізінен Статистика жүргізумен айналысатын адамдардың жалақысына бөлінетін болады, - деп толықтырды агенттік басшысы.

Санақ нәтижелерін жыл соңына дейін анықтау жоспарланған.