Биыл Қазақстанда 26 жаңа көкөніс қоймасы ашылады

2023 жылы Қазақстанда жалпы сыйымдылығы 104,5 мың тонна болатын 26 жаңа көкөніс қоймасы ашылса, 2026 жылға қарай елімізде тағы 35 заманауи қойма пайда болады. Олар қазірдің өзінде еліміздегі сыйымдылығы 1,9 миллион тонналық 1208 қойманың тізіміне енетін болады.

ҚР Ауыл шаруашылығы министрлігінің мәліметінше, соңғы жылдары Қазақстанда көкөніс қоймаларының тапшылығы байқалуда, мәселе маусымаралық кезеңде әсіре өткір болып отыр. Сондықтан елімізде көлемі 335,6 мың тонна жеміс-көкөніс өнімдерін сақтайтын кемінде 97 қойманы салу мен жаңғыртудың кешенді жоспары әзірленді.

Көрсеткіштерден озық жұмыс атқарылуда. Мәселен, 2021 және 2022 жылдары 181,5 мың тоннаға жоспарланған 36 жобамен 200,8 мың тоннаға дейін өнім қабылдай алатын 37 көкөніс қоймасы ашылды.

Көкөніс өнімділігінің өсуін ескере отырып, Қазақстан үшін қойма инфрақұрылымын кеңейту және қолданыстағы көкөніс қоймаларын жаңғырту мәселесі өзекті екені рас.

2022 жылы шаруалар 4,1 миллион тонна картоп, 621,4 мың тонна сәбіз, 1,1 миллион тонна пияз және 552 мың тоннаға жуық қырыққабат жинады. Оларды сақтау инфрақұрылымын құру ауыл тұрғындарының жоғалтқан табысының орнын толтыруға, импортқа тәуелділікті азайтуға, сондай-ақ маусымаралық кезеңде түпкілікті тұтынушы үшін өнім бағасын тұрақтандыруға мүмкіндік береді.

Сақтау қоймаларын құруға және жаңғыртуға инвестицияларды тарту үшін Жоспар өнімді ұзақ сақтауды қамтамасыз ететін арнайы жабдықтары бар заманауи қоймаларды салуға инвестициялық субсидиялау ставкасын 25 пайыздан 40-50 пайызға дейін арттыруды көздейді.