Биыл Қазақстанда пойыз астына түсіп 36 адам ажал құшты

2024 жылдың басынан бері пойыз астына 55 адам түскен, оның 36-сы қайтыс болды.

Бұл туралы ішкі істер министрлігі  хабарлады. 

Соңғы жантүршігерлік апат Жетісу облысында тамыз айында болды. Демалыс күндері Қарабұлақ-Талдықорған аралығында жүк пойызы теміржолды  белгіленбеген жерден заңсыз өткен ер адамды қағып өлтірді. Тергеу істері жүргізіліп жатыр. 

«Өкінішке қарай, қайғылы оқиғалардың көпшілігі теміржолда жүріп-тұру ережелерін сақтамау салдарынан болады. Әлі күнге дейін адамдар теміржолдың қаншалықты қауіпті аймақ екенін, оның зардаптарын жете түсінбейді», – деді көліктегі полиция департаментінің бастығы Бақытжан Малыбайұлы. 

Көлік полицейлері азаматтарға теміржол аймағында қауіпсіздік ережелерін қатаң сақтауға үндейді.