Биыл инфляция 2 есеге төмендеуі мүмкін

Бүгін Үкімет басшысы Әлихан Смайыловтың төрағалығымен Үкімет отырысы өтті. Үкімет отырысында қаңтар-сәуір айларындағы әлеуметтік-экономикалық дамуы мен республикалық бюджеттің атқарылу қорытындылары қаралды.

Үкіметтің баспасөз қызметі хабарлағандай, Смайылов 4 айдың қорытындысы бойынша ел экономикасы жақсы өсу қарқынын көрсетіп отырғанын айтты.

«Қазіргі жағдайда біз экономикалық өсімнің жоғары қарқынын қамтамасыз етуіміз керек. Бұл – оңай шаруа емес. Оған экономиканың салаларында үйлесімді жұмысты қамтамасыз ете отырып, қол жеткізуге болады. Алдымызда тұрған міндеттерді орындау үшін әрбір министрлік пен өңірдің қосатын үлесі аса маңызды» деді Смайылов.

Сондай-ақ Үкімет басшысы негізгі капиталға 18,5 трлн теңге мөлшерінде инвестиция тарту керек екенін атап өтті.

«Біздің мақсатымыз – биыл инфляцияны 2 есеге төмендету. Ол үшін үйлесімді және нақты шұғыл шаралар қажет. Биылғы жылдың сәуір айында инфляция 16,8%-ға дейін баяулады. Өңір әкімдері әлеуметтік маңызы бар азық-түлік тауарларының бағасын тұрақтандыру бойынша сапалы жұмысты жалғастыруы керек» деді ол.