Биыл ҰБТ-ны үш ай ішінде екі рет тапсыруға болады

Жылдағыдай емес, биыл тамыз айында тапсырылатын ҰБТ  алынып тасталды. Оның орнына талапкерлер жаздың үш айында екі рет ҰБТ тапсыруға мүмкіндік алды.

Биылдан бастап ҰБТ электронды үлгіге ауыстырылды, осыған байланысты  жаңалық енгізіліп отыр. Жаңа ережеге сәйкес талапкер тесті қалаған уақытында тапсырса болады.  Тест нәтижесінің қайсысы жоғары болса, оқуға түсу үшін соны қолданады.

Ұлттық тестілеу орталығы бұның бітірушілер қобалжымас үшін жасалып отырғанын мәлімдеді. Оның үстіне бір рет қажетті бал  жинай алмаған талапкерке  екінші рет тапсыратын мүмкіндік беріп, қалаған мамандығына  түсуге жол ашылады.

 Ал «Электронды үлгі» тесті  онлайн тапсыру емес. Бұрынғысынан айырмашылығы тест жауаптарын бұрынғыдай қағазға емес, компьютер арқылы белгілейді.

Тағы бір ерекшелігі  ҰБТ тапсыру бұрынғыдай белгілі бір күнге бекітілмейді. Түлектер үш ай ішінде, қалаған уақытында барып тапсыруға мүмкіндік алды.