Биыл қазақстандықтар қалай құрбан шалады? – Дін басқармасы

Қазақстан мұсылмандары діни басқармасы 2021 жылы қазақстандықтар қалай құрбандық шала алатындықтарын түсіндірді.

Бұл туралы Orda.kz хабарлады.

Биыл құрбан шалу рәсімі былтырғыға ұқсас келеді.

1. Мемлекеттік санитарлық-эпидемиологиялық қадағалау органдары тарапынан рұқсат берілген жергілікті қасапханаларда санитарлық ережелерді қатаң сақтай отырып құрбан шалу, яғни дәстүрлі жолмен ұйымдастыру.
2. Бүгінгі пандемия жағдайында құрбан шалушыға қолайлы жағдай жасау және көмекке мұқтаж жандарды қолдау мақсатында өткен жылдың тәжірибесі негізінде www.qurban2021.kz сайты арқылы тапсырыс беріп, онлайн режимде құрбандық шалу.

– Карантин жағдайында қалада тұрып жатқан азаматтар үшін қашықтықтан өз атынан құрбан шалуға тапсырыс беру – оңтайлы шешім. Шариғат бойынша адам өзінің атынан басқа кісіні белгілі бір іске уәкіл ете алады. Өйткені адам баласы кейбір жағдайда бір істі орындауға мүмкіндігі болмай қалады. Осы кезде біреудің көмегіне жүгінеді, яғни сол істі оған тапсырады, оны өзінің атынан уәкіл етеді, - делінген хабарламада.

Ал ауылдық жерде жеке үйде тұратын адамдар үшін ешқандай шектеу жоқ.

Онлайн құрбандық шалуға тапсырыстар 20 шілде айт намазынан кейін қабылданады. Өтінішті қабылдаумен және оны мұқтаж жандарға бөліп берумен мүфтияттың жергілікті өкілдері айналысады. Сондай-ақ, бұл шараға еріктілер мен мешіт қызметкерлері тегін тартылады.

– ҚМДБ қаржыға араласпайды. Құрбандыққа шалынатын түлік бағасы жергілікті нарық бағасымен көрсетіледі. Осы орайда еліміздің әр аймағындағы малдың бағасы әртүрлі екенін ескеру қажет. Нұр-Сұлтан, Алматы, Шымкент және облыс орталықтарында малдың бағасы бірдей болмауы мүмкін. Ал тапсырыс берушіден түскен қаражат мал иесіне, яғни сатушыға тікелей беріледі. Өйткені бұл делдалдық қызмет емес. Көрсетілген сомаға қасапшының қызметі ғана кіреді, - деді Қазақстан дін басқармасында.

Құрбан айт кезінде бай адамдар құрбандық шалуға міндетті. Шариғат бойынша «бай» деп мал-дүниесі нисап мөлшеріне жеткен адамды айтады.

Нисап мөлшері – 40 қой (ешкі), 30 ірі қара, 5 түйе немесе қажеттілігінен артық 85 гр алтын (1 230 000 теңге) қаражат.

Ал мүлкі бұл мөлшерге жетпегендерге құрбандық шалу міндетті емес.

Еске салсақ, Құрбан айт 20-22 шілде аралығында өтеді.