Бишімбаевтың қолынан қаза тапқан марқұмның туыстары істі «жылы жаба салады» деп күдіктенеді

Жерлеу рәсімінен кейін Салтанат Нүкенованың туыстары тергеудің барысы туралы айтты. Қылмыстық іс қозғалғалы бірнеше күннің ішінде үш тергеуші ауысып үлгергені белгілі болды.

«Желідегі жалған жарияланымдар мен түсініктемелерге қарап, жағдайды «жаба салуға» немесе жұмсартуға тырысады деген күдік пайда болды. Іс ашылғаннан бері үш тергеуші ауысты, оның себептері белгісіз. Сонымен бірге ескі тергеушілер жаңаларының нөмірін де бермейді, қоңырауларға да жауап бермейді» деп жазады туыстары Instagram парақшасында. 

Нүкенованың отбасы тергеудің әділ өтуін талап етіп отыр. Олар экс-министр Қуандық Бишімбаевтың отбасы кешірім сұрамағанын хабарлады.

«Марқұмның денесінің сау тамтығы қалмаған. Бізде оның суреттері мен видеолары бар, егер сіз оны көрген болсаңыз, бұл өте қатыгездікпен жасалған кісі өлтіру екеніне күмәнданбас едіңіз. Адал тергеу жүргізіп,  жасалған аяусыз зорлық-зомбылықты ақтауға тырыспауды сұраймыз».

Естеріңізге сала кетейік, 9 қарашада бұрынғы Ұлттық экономика министрі Қуандық Бишімбаев әйелін өлтірді деген күдікпен ұсталған болатын. Алдын ала мәлімет бойынша, мейрамханада Бишімбаев пен оның әйелі Салтанат Нүкенованың арасында жанжал шыққан. Ол соққыдан қайтыс болды.