Бишімбаевтың көлеңкесі: «Гастроцентр» ғимаратында тағы да дау шықты

«Гастроцентр» төңірегінде тағы дау шықты. Оның құрамындағы бір мекеменің өкілдері Қуандық Бишімбаевтың қарындасы жұмысты әдейі бөгеп отыр деп мәлімдеді, деп хабарлайды Orda.kz.

Өткен жылдың ақпанында ZIMA түнгі клубы «Гастроцентр» ғимаратының бірінші қабатын толық сатып алған еді. Бұл ғимараттың екінші қабатында Салтанат Нүкенова қаза тапқан BAU мейрамханасы орналасқан. Біраз уақыттан кейін клуб келушілерге есігін ашты.

Қанды оқиғадан кейін Бишімбаевтардың кешенді басқарудан кеткені айтылған. Алайда соған қарамастан, мекеме әлеуметтік желілерде сынға ұшырай берді. Жаңа иелер мен әкімшілік бірнеше рет жұрттан түсіністік танытуды сұрап, бұрынғы экономика министрінің «Гастроцентрге» қатысы жоқ екенін мәлімдеген. 

Жуырда ZIMA түнгі клубының өкілдері Қуандық Бишімбаевтың әпкесі ескертусіз мекемеге кіріп, жарықты өшіріп тастағанын, сондай-ақ «Гастроцентр» әкімшілігі арқылы қосымша келісім енгізу мәселесін көтергенін хабарлады. Ол келісімге сәйкес клуб желтоқсан айында ғимараттан шығуы тиіс.

«Егер құрылтайшылар расымен кеткен болса, неге олардың жақын туыстары кешеннің ішкі жұмыстарына араласуын жалғастырып отыр? Әлде «Гастроцентр» әкімшілігі жалға алушылар мен жұртшылықты нақты басқару құрамына қатысты шатастырды ма?» деп жазды ZIMA түнгі клубының өкілдері әлеуметтік желілерінде.

Айта кетейік, «Гастроцентр» аумағында бірнеше мекеме орналасқан. Салтанат Нүкенова қаза тапқанға дейін кешен Қуандық Бишімбаевтың анасына тиесілі болған. Қазір ғимарат шетелдіктердің қолына өткен.

Еске сала кетсек, бұрынғы ұлттық экономика министрі азаматтық жұбайы Салтанат Нүкенованы азаптап, қатыгездікпен өлтіргені үшін 24 жылға сотталды. Бишімбаев жазасын Степногорск қаласындағы №5 түзету мекемесінде өтеп жатыр.