Бишімбаевтың анасы сотта жеңіп, бір миллион долларын өндіріп алды

Елордада шамамен бір миллион доллар көлеміндегі алаяқтық ісі бойынша сот процесі аяқталды. Жәбірленуші ретінде бұрынғы ұлттық экономика министрі Қуандық Бишімбаевтың анасы Альмира Бишімбаева (Нұрлыбекова) танылды, деп хабарлайды Orda.kz.      

Айыптау нұсқасына сәйкес, оның туысы Бекзат Кемелова оны алдап, ірі көлемдегі қаражатын алып алған.

Қылмыстық іс жөніндегі мамандандырылған ауданаралық сот Кемелованы ақша жымқырғаны үшін кінәлі деп танып, оған алты жыл сегіз айға бас бостандығынан айыру жазасын кесіп, мүлкін тәркілеу туралы үкім шығарды.

Сот сонымен қатар сотталғаннан келтірілген шығынды өтеу есебіне 500 млн теңге өндіру туралы шешім қабылдады. Кемелованың кәмелетке толмаған баласы бар болғандықтан жазаны өтеу бір жылға кейінге шегерілді.

Жәбірленуші тараптың адвокаты Ерлан Ғазымжановтың айтуынша, куәлардың бірі жалған айғақ берген. Осыған байланысты оған қылмыстық жауапкершілік қаупі төніп тұр.

«Сот аудан прокурорының назарына куә Қарлығаш Әбдіқұлованың жалған айғақ бергені туралы жеке қаулы шығарды. Ол Кемелованың күйеуінің жиені. Егер жеке қаулы заңды күшіне енсе, жалған айғақ беру фактісі бойынша қылмыстық іс қозғалады. Тергеу барысында оның шынымен жалған куәлік бергені дәлелденсе, іс сотқа жолданып, тиісті үкім шығады», — деді Ғазымжанов. 

Бұның алдындағы сотта Бекзат Кемелова алаяқтық жасағанын мойындамады және азаматтық талаппен келіспейтінін айтқаан болатын.

Тақырыпқа қатысты ұсынамыз:

• Бишімбаевтың әкесі Нүкеновтердің 2,5 миллион доллар бопсалағанын айтты
• Көк шабадандағы миллион доллар: Бишімбаевтың анасы мен қарындасы сотта куәлік етті
• Бишімбаеваның анасы туысын 1 млн долларға жуық қаражат ұрлады деп айыптады