Бишімбаевтың адвокаты судьяны ауыстыруды талап етті

Өз әйелін өлтірді деп айыпталған Қуандық Бишімбаевтың адвокаттары судьяның ауысуын талап етті.

Судья Айжан Құлбаеваға адвокат Ерлан Ғазымжанов қарсы шықты. Экс-министрдің басқа қорғаушылары Назкен Құсайынова мен Ләйлә Рамазанова сот отырысына кешігіп келгендіктен ол кезде сот залында болмады.

«Біз себебін білмейміз. Әріптесіміз солай шешті, біз сот залында болған жоқпыз. Бізде параллель процесс жүріп, кіріп үлгермедік. Оның қылмыстық іс жүргізу кодексінде көзделген негіздері болған. Оның бұған құқығы бар»,- деді Назкен Құсайынова Orda.kz тілшісіне берген сұхбатында.

Осыдан кейін процеске қатысушылардың барлығынан сот залынан шығу сұралды. Барлығы 20 минуттай дәлізде болып, судьяның одан әрі әрекетін күтті. Салтанат Нүкенова тарапы түпкілікті шешім қабылданғанша бұл оқиғаға қатысты пікір білдіруден бас тартты.