Бишімбаев түрмемен соттасуын тоқтатар емес

Азаматтық жұбайы Салтанат Нүкенованы азаптап өлтіргені үшін сотталған бұрынғы экономика министрі Қуандық Бишімбаев өзі жазасын өтеп жатқан колония әкімшілігінен ынталандыру алуға талпынысын жалғастыруда, деп хабарлайды Orda.kz.

Сотталушы жақсы тәртібі мен жетістіктері үшін ынталандыру алғысы келеді. Айта кетейік, бұған дейін Бишімбаев түрме ішінде өткізілген шахмат турнирінде бірінші орынды иеленген еді.

Бірінші инстанция сотында экс-министр жеңіліп қалды. Енді ол  бұл шешімді қайта қаратуға ниетті. Оның адвокаты Orda.kz тілшісіне қорғауындағы азаматтың атынан апелляциялық шағым түсіргенін мәлімдеді.

Бұған дейін біз экс-министрдің ата-анасымен қосымша кездесуге қол жеткізуге тырысып жүргенін жазған едік. Осы мақсатта ол түрлі жарыстар мен мәдени шараларға қатысып келеді. Алайда, Бишімбаев ынталандыру ала алмады және түрме қызметкерлерін әділетсіздік танытты деп айыптады. Ал мекеме басшылығы оның тәртіп бұзғанын мәлімдеді. Бірақ, нақты қандай ережені бұзғаны белгісіз.

Еске сала кетейік, бұрынғы ұлттық экономика министрі азаматтық жұбайы Салтанат Нүкенованы азаптап, қатыгездікпен өлтіргені үшін сотталды. Бишімбаев жазасын Степногорск қаласындағы №5 түзету мекемесінде өтеп жатыр.