Бірнеше қалада зейнет жасын төмендетуге арналған митингілер өтті

Наурыздың 8-і күні ел астанасында, Алматы мен Ақтөбе қалаларында  зейнет жасын төмендетуге байланысты наразылық акциясы өтті. Реформаларға сәйкес әйелдер 63 жаста зейнетке шығады. Шерушілер зейнет жасын  58-ге  дейін төмендетуді талап етті.

Үш қалада да митинг өткізуге әкімдіктер рұқсат бермеді, деп хабарлайды Азаттық радиосы. Осыған қарамастан әйелдер 2018 жылы басталған зейнетақы реформасына дейінгідей зейнет жасын 58 жасқа дейін төмендетуді талап етіп митингке шықты.

Ел астанасы,  Алматы мен Ақтөбеде әйелдер «Қазақстан әйелдерінің зейнет жасын 58 жасқа дейін қысқарту қозғалысы» атты плакаттармен шықты. Ресми түрде тіркелмеген бұл қозғалыс еліміздің әртүрлі қалаларындағы әйелдерге көмектеседі.

Үш қалада да әкімдік өкілдері биліктің келісімін алмағандықтан митингіге тыйым салынды деп, әйелдерді тарап кетуге шақырды. Ақтөбеде әкімдік қызметкері жиналғандарға заңсыз митингі өткізгені үшін әкімшілік жауапкершілікке тартылатынын ескерткені айтылады. Қазақстан Республикасының заңнамасына сәйкес, бұл әкімшілік құқық бұзушылық үшін (ӘҚБтК-нің 488-бабы) ескерту, айыппұл салу немесе 10 тәулікке дейін қамауға алу қаупі бар.

Қазақстанда зейнетақы реформасы 2018 жылдың 1 қаңтарынан басталды. Содан бері елімізде әйелдердің зейнет жасын кезең-кезеңімен ұлғайту қолға алынды. Жыл сайын алты ай қосылады. 2022 жылы 60 жасқа толған әйелдер зейнетке шығады. Егер туған күні екінші жартыжылдықта болса, онда әйел желтоқсан айына дейін жұмыс істейді, сәйкесінше 60,5 жыл зейнетке шығады. Қазақстандық әйелдердің көпшілігі мұндай өсімді қатты сынап, онсыз да әйел адамға  мұндай жаста жұмыс істеу қиын деп есептейді.