Бірінші рет қылмыс жасаған есірткі жасырушыларға жаза жеңілдей ме?

Мәжілістегі Amanat партиясы фракциясы жиынында партия төрағасы Ерлан Қошанов алғаш рет қылмыс жасаған есірткі тасымалдаушыларының жазасын жеңілдету мүмкіндігін қарастыруды ұсынды, деп хабарлайды Orda.kz. 

Оның айтуынша, бүгінде есірткі қылмысы үшін сотталған 4 мыңнан астам адамның 1300-ге жуығы есірткі жасырушылар саналады. Олардың арасында жасөспірімдер мен қаржыдан қиындық көргендер бар. Олар заң бойынша 10 жылдан аса уақытқа бас бостандығынан айырылады. 

«Шынында, оларды осы заңсыз іске тартқан есірткі өндірушілер мен «есірткі тығуды» ұсынатындардың жазасы пара-пар емес. Сондықтан Мемлекет басшысы айтқандай, олардың әрқайсын бөлек қарап, жаза деңгейін заң жобасының екінші оқылымына дейін қарастыру қажет. Бұл ретте есірткінің заңсыз айналымына қатысы бар құқық қорғаушыларды наркобарондарға теңестіруді және оларға өмір бойына бас бостандығынан айыруға дейін ең ауыр жаза қолдануды ұсынамыз», – деді ол. 

Ерлан Қошанов Қазақстан есірткіні заңсыз тұтыну деңгейі жоғары елдердің қатарына кіретінін айтты. Елде жыл басынан бері 1 тоннадан астам «синтетика» тәркіленген.