«Біреуі қайтыс болды»: Петропавлда екі үйсіз әйел жылу жүйесінің ішінде өртеніп кете жаздады

Петропавлда тұрғылықты жері жоқ екі әйел жылу коллекторының ішінде өртеніп кете жаздады. Нәтижесінде екеуі де қатты күйік алған. Олардың бірі ауруханада қайтыс болды, деп хабарлайды Orda.kz.

Үйсіз әйелдер көпқабатты үйлердің бірінің жанында тұрған. Олар сол жерде түнеп, темекі шеккен. Болжам бойынша өрттің себебі – темекі тұқылы болуы мүмкін.

Өрт сөндірушілерді көпқабатты үйдің тұрғыны шақырған. Ол жылу коллекторының маңынан қалың түтін шыққанын көрген.

«Коллектордың ішінен екі әйел табылды. Олар құтқарылып, жедел жәрдем дәрігерлеріне жеткізілді. Өртті сөндіруге жеті қызметкер мен екі техника қатысты», деп мәлімдеді СҚО ТЖД баспасөз қызметі.

Құтқарылған екі әйелдің де жағдайы ауыр. 36 жастағы әйелдің денесінің 80 пайызы күйген. Сонымен қатар, оның тыныс алу жолдары күйіп, көміртегі тотығымен уланған. Бұл әйел ауруханада қайтыс болды. Ал 29 жастағы досы ауыр халде жатыр; дәрігерлер оның денесінің 60 пайызы күйгенін хабарлады.

Полиция әйелдермен бірге бір ер адамның болғанын анықтады. Ол өрт шыққанда қашып үлгерген, бірақ кейін полиция қызметкерлері оны ұстады.

Айта кетейік, денсаулық сақтау министрі Ақмарал Әлназарова өз киімінің бренді мен бағасы туралы журналист сұрағына жауап беруден бас тартты.